تلاقي ناس بتقولك بلاش تشتري العربية دي أصل عفشتها ناشفة وهتقرفك واللي يقولك أه خليك في العربية دي ممتازة لأن عفشتها ناعمة وجميلة وهتريحك ..
?
ثوااااااني يااا عالم بس كدة 
?
Table of Contents
هو يعني إيه عفشة ناشفة وعفشة ناعمة ؟؟
وإيه الفرق بينهم وهي مش العفشة كلها مكوناتها واحدة !! يعني مقصات ومساعدين وجلب وإتياش وغيرهم
طب ما أهو عادي يعني مفيش إختلافات اهه طب ليه ظهر مصطلح العفشة الناعمة والعفشة الناشفة ده !!
أول حاجة بتفرق العفشة الناعمة أو المريحة عن العفشة الناشفة اللي بتتعب دي
يعني إنك أول ما تفتح باب العربية وتقعد على الكرسى هتشوف لو العربية بترحب بيك وبنزولك على كرسى العربية وهل العربية أمتصت وزنك وأحتوتك كدة بالراحة وقالي تعالي في حضن اخوك يا فواز دي كدة عفشة ناعمة
أما العكس لو نزلت على الكرسى حسيت إن العربية أتهبدت بيك وكأنها بتقولك ياااااني أنت هتركب تانى ولقيت نزول العربية بوزنك مضغوط وعلى مرة واحدة يبقى دي كدة عفشة ناشفة.
==================
تاني حاجة بتفرق بين النوعين 
?
فى المشى والحركة يعني لو مع المطبات والنقر اللي بتبقي فى الارض حسيت إن العربية بتاكل الطريق ووزنها خفيف على الأسفلت ومش فارق معاها الكلام اللى فى الارض تحس كأنها مرفوعة عن الأرض دي كدة تبقي عفشة ناعمة أما لو حسيت بدبدبة بتسمعها على صورة ذبذبات مكتومة فى أرجاء العربية زي ما يكون العربية ماشية تتأكد من كل زلطة على الارض وتطمن إنها داست عليها وأحتضنتها دي كدة تبقى عفشة ناشفة.
==================
تالت حاجة بتفرق برضو بين النوعين ?
الثبات علي السرعات العالية هتلاقي العفشة الخشنة اللى أنت مكنتش طايقها في البلد هى دى اللى هتعملك أفضل ثبات
طب يعني ايه ثبات
يعني وانا ماشي علي فوق ال160 وتعدي جنبي عربية اسرع محسش اني اتحركت من مكاني
يعني لو خدت غرزة علي سرعة عالية احس ان متحكم في العربية من غير اي تعويم ايا كانت السرعة
يعني لو خدت ملف علي سرعة عالية العربية تبقي موزونة متترفعش من جانب وتحس انك بتتقلب
أما العفشة الناعمة اللى أنت كنت مبسوط بيها جوه البلد وكنت حاسس إنها حضناك هى دى اللى هتخلي العربية تعوم منك شوية علي السرعات العالية وهي هي بظبط اللي هتخليك تبقي قلقان وهتلاقي نفسك نزلت لـ 120 بعد ما كنت علي180 لأنك حسيت إن العربية هتتقلب علي جنبها.
==================
الثبات هو “مدي إستقرار العربية علي الطريق ومقاومتها للعوامل والظروف الطبيعية والخارجية والطرق، في مختلف الأجواء والظروف المحيطة بيها، وعلي مختلف السرعات المنصوص عليها من قبل صانعها”.
طيب هو إيه يعني عربية غير ثابتة “هي العربية الصغيرة ذات محاور العجلات الضيقة، وخفيفة الوزن”.
==================
من التعريفين دول نستنتج إن العربية الثابتة “هي العربية ثقيلة الوزن نسبياّ، وذات محاور العجلات العريضة والتي يكون تصميمها ان مركز ثقلها قريب من الأرض” .. يبقي إذن نقدر هنا بقي نرد ونقول إن العربيات الحديثة مهما كانت عفشتها ناعمة ومش بتحسسك بالطريق فا وزن العربية بيبقي ليه عامل كبير بالإضافة إلي الإهتمام بتصميم العربية “نظام تخلخل الهوا من علي جسم العربية” + الإهتمام بإقتراب مركز ثقل العربية للأرض ودي هيديها ثبات عالي جداّ في الملفات
لاكن المشكلة دي بتقل جدا في الماركات الفارهة زي المرسيدس بسبب التكنولوجيا المستخدمة وهي نظام التعليق المنفصل
اللي بيوفر المرونة وفي النفس الوقت الثبات والاتزان
لو عايز تعرف اكتر وازاي مكن تكشف علي عفشة العربية بنفسك من هنا