موقع عربية

دليلك في عالم السيارات

اعطال شائعة موضوعات مهمة

ازاي تكشف علي عفشة العربية

عفشة العربية
ازاى تكشف على عفشة عربيتك

مكونات عفشة السيارة
عفشة العربية

بطريقة سهلة وتوفر فلوسك

المساعدين اول جزء من عفشة العربية

المساعدين

إزاى تكشف على حالة المساعدين ؟!

المساعدين هي من اهم اجزاء العفشة
هتهز العربية من الأربع جهات (شمال قدام – شمال ورا)(يمين قدام – يمين ورا)
عن طريق إنك تيجى فى كل اتجاه من اللى قولنا عليهم دول تضغط عليها بقوة لو العربية ردت بسرعة يبقى العفشة بتاعت الحتة دى تمام
أما لو ردت ونزلت تانى فده دليل إن المساعدين في الجزء ده ضعيفة وهيكون حاجة من الأتنين.
(ضعف ياى) أو إن الهواء اللي في  المساعد  فضى وممكن يجيبوا زيت ودي من (أعراض تلف المساعدين).
ولااااازم تكون دقيق ومتفوتش أى تفصيلة لأنك لو فوت حاجة جيبك هيفوت بعد كدة.

الاسكاترا تاني جزء في عفشة العربية
ازاي تكشف عالاسكاترا

هز الدريسكيون وعينك على العجل لو من أى حركة بسيطة للدريسيكون العجل بيتحرك معاها يبقى كدة الإسكاتره تمام وإستجابتها تمام أما لو بيحصل العكس يبقى فيها سنة بوش وممكن ميكونش فيها بوش بس العلبة نفسها من جوة بدأت تروسها تتاكل من جوة ودى بتبقى أسمها حشوة علبة الدريسكيون ودى بتغيرها لما بتسمع صوت خبط مع أى أرض مش ممهدة وغربلة فى الطارة وهتحس بيها أكتر كمان بعد سرعة 80 .. أما لو الدريسكيون عندك تقيل يبقى الإسكاتره بتسرب زيت الباور وفى الحالة دى لازم الإسكاتره تتفك وتحل الجوانات والأويل سيلات اللى فيها اللى بتحجز الزيت.

 

المقصات

وانت واقف هز عجل العربية لجوة وبرة لو كان ثابت ومفيش رعشة في الجنط يبقي كده المقصات تمام
لو في هزة معاك يبقي كده جلب المقصات محتاجة تتغير جديدة او بتغير المقص استيراد بحالة نضيفة

الكبالن

كمان وأنت ماشى شوف كدة أى U Turn تلفه بالعربية وأنت بتلف زود سنة بنزين خفيفة .. لو سمعت صوت طقطقة يبقى دى كبالن

————————————————

طب وأنا ماشى بالعربية ينفع أكشف علي عفشة العربية ؟!

طبعآ ينفع وده الجزء الأسهل فى الموضوع ولازم تعرف إن عيوب العفشة أصلآ مش بتظهر غير والعربية ماشية مع المطبات بتاعتنا والبلاعات.

1- ناخد كام مطب أو بلاعة (بالراحة طبعآ عشان العربية متزعلش مننا) ونلاحظ مدى تماسك العفشة والعربية ككل ودرجة إحساسك بالمطب يعنى الصدمة بتجيلك جامدة ولا بتحس إن فيه تناغم كدة والعفشة شايلة عنك ؟! ولا رايحة فى داهية وتحس بكل حاجة ؟!

لازم تمشى بالعربية فى طريق مستقيم وتسيب الدريكسيون وتشوف العربية هتحدف يمين أو شمال .. لو حدفت يبقى تكشف عليها وتشوف هل مشكلة زوايا ولا الشاسيه فيه مشكلة ومحتاج مرسة هوا ولا المقصات فيها مشكلة ؟!

2- أقف بالعربية وخلى الموتور داير ولف الطارة يمين وشمال لحد الاخر (لحد لما الدريكسيون يقف) لازم متسمعش صوت أى طقطقة أو تكتكة .. لازم متسمعش حاجة غير صوت إحتكاك الكاوتش ولو كانت العربية فيها باور لازم تشوف لو الدريسيكون فيه هزة ولا لأ حتى لو بسيطة وشوف لما تجيبه لحد الآخر بيرجع حبة ولا بيفضل ثابت على مكانه ؟! لأنه لو رجع من مكانه أو بيتهز فا ده دليل على حاجتين .. يا إما إن الاسكتره اللى ماسكة الدريسيكون وتوجيه العربية فيها مشكلة أو إن طلمبة الباور نفسها فيها مشكلة .

وفيه إختبار تاني

إنك هتجيب سرعة مش أقل من 70 ومش أكتر من 80 وهتمور العربية ولو أوتو هتجيب الفتيس على N وهتدوس فرامل  بس مش كلبشة يعنى وتنقل رجلك على البدال بس بسرعة  وتكون سايب الدريكسيون خالص
لو العربية حدفت يمين أو شمال حاجة بسيطة متقلقش ده طبيعى نتيجة إنك سايب الدريكسيون أما لو حدفت حدفة جامدة كدة يبقي ممكن أوي يكون السيرفو او ال ABS فيه مشكلة ومش بيوزع ضغط الزيت مظبوط أو طنبورة متاكلة وبتودع ..

البطاحات

لما تسمع صوت تزييق يبقى كدة البطاحات وزى ما قولنا قبل كدة البطاحات دى هى اللى ماسكة المساعد ولو أى إهمال فيها ممكن تلاقى المساعد نط من مكانه.

صليبة الدركسيون

لو بتلف الدريكسيون فى ملف ومش بيرجع لوضعه الطبيعى معاك بسهولة يبقى كدة صليبة الدريكسيون عاوزة تتغير.

ملحوظات مهمة للحفاظ علي عفشة العربية

1- العفشة لازم تتربط كل 20 ألف كيلو.
2- متاخدش الملفات قفش وعلى سرعة عشان تحافظ على الكبالن.
3- شحم العفشة دايمآ كل 20 ألف بعد التربيط.
4- لما تركن العربية متكسرش العجل عشان تحافظ على الكبالن.
5- حاول تتفادى النقر على قد ما تقدر.
6- خد المطبات بالراحة جدآ عشان تحافظ على الإسكاترة.
8- دايمآ فى كل تربيطة عفشة ربط على البطاحات أهم حاجة لأننا زى ما قولنا هى اللى ماسكة المساعد وبتخليه يلف يمين وشمال.

share Now

اترك ردا

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.