ظبط عربيتك قبل الشتا

فصل الروقان والجو الحلو والمطر بدأ
يبقي لازم تجهز عربيتك للشتا 
خصوصا لو كنت من سكان اسكندرية او التجمع  😆 

◇ اهم حاجه تغير المساحات وتراجع على الموتور بتاعهم وعلى قربه المياه والموتور والبخاخات وضيف في قربة المساحات مياه وبريل اوحط فيها جلانس بتاع الزجاج وهات ارخص حاجه وكمل القربه ب مياه عادى
○ طيب عندك بخاخات مسدودة يبقي تغيرهم او تفكهم وتحطهم فى خل لمده يوم وتركبهم وتنضفهم بإبرة خياطه وتخلى حد يبخ مياه عشان مش هينضفو غير بضغط المياه
○ الموتور مش شغال يبقي تغيرة او تفكه وتنضفه وتجرب
◇ فك التوربيدو ( الجزء في نهاية الكبوت ) هتلاقى فيه بلاوى طين وورق شجر نضفه تمام اوى وسلك مجارى المياه.

وكمان
◇ فك كرتيرات العجل وتنضف بقا الطين المستخبي جوة وتغسل كويس وتنشف
◇ هتجيب بلك او انتركوت وفرشه سلك من عند اى حد بتاع بويا واى منطقه انت شاكك فيها صنفرها كويس ورش عليها انتركوت او ادهنها بلك
◇ اى كارتيرا بايظة او مقطوعه غيرها والدلايات ركبها واى طبه فى العربيه ناقصه ركبها
ولأن مشاكل البطارية بتظهر في الشتا اكتر من الصيف
◇ روح لكهربائى بيفهم يقيس شحن البطاريه وشحن الدينامو ويراجع على الفيوزات والكتاوت ويأكد على عزل الضفيرة وانها بعيدة تماما عن اى مياه …
◇ هتروح لميكانيكى بيفهم برضه هيراجع على البوجيهات والسلوك والموبينه والاسبراتير والشاكوش والمشط والحساسات وكاوتش الكوبلن ولو شاكك فى حاجه غيرها

 

كيفيه التعامل مع برك المياه أوالشبورة


في الشبورة  ماتنورش النور العالى ولا الزينون ولا الليد الاضائه الوحيدة هيا اللمبه الصفرا العاديه
نور نور الشبورة الخلفى والامامى
لو الزجاج مشبر شغل التكييف وتخليه على الزجاج الامامى
ولو التكييف مش شغال فى طرق كتير موجودة على النت
منها ملح خشن وحطه فى قطعة قماش وحطه على التبلوة او مسح الزجاج من الداخل

حالة الامطار

مخاطر المطر والماية علي موتور السيارة
الحفاظ عالسيارات في الشتاء

في حالة الامطار ونظرا لتغيير الظروف المناخية  في التجمع والقاهرة الجديدة  وهطول الامطار
لو الامطار خفيفة راعي المسافات والسرعة عشان الفرامل المفاجأة
ولو الامطار قوية يفضل انك تركن لحد انتهاء الامطار وتركن العربية في مكان مرتفع نسبيا عشان ميتجمعش تحت العربية مايه

لو كنت راكن وحصل مطر غزير غرق العربية زي الشتا اللي فات في التجمع يبقي تركز في اللي جاي ده :
لازم تعرف يعنى ايه مياه جوة العربيه وتتعامل معاها اذاى
اوعى تشغل العربيه لو كنت راكن في جراج غرقان بالمياه او حصل دخول مياه أمطار او غيره و السواقة في المياه العميقة ممكن يكون أخطر شئ تعمله بالنسبة للعربية و خاصة للموتور.
وده لانة للاسف الموتور داخلة مياة من عند فلتر الهوا فتحة دخول الهواء

يانهار ابيض عربيتى باظت طب اعمل ايه ابيعها واشترى مركب
هتفتح باب العربية بالمفتاح وتفتح الكبوت وتجري تفك البطاريه
ترجع بقا تانى جوة العربيه
تحل الكراسي وتشيل الفرش بتاع الارضيه وفرش الباب وتسلك يابيه مجارى الميه اللى فى الباب وتفك الطبب اللى فى الارضيه كلها والشنطة وتفتح بيبان العربيه وتسبها تنشف هتفك الفبر بتاع العتب كمان وهتفك الكنترول وتجيب اكاى الازرق (منظف الكترونيات ) وفرشه أسنان قديمة وترش على الفيش بتاعت الضفير وتدعك وتنضف من رواسب المياه عشان ماتعملش املاح او اى قفله لاقدر الله وطبعا هتعمل كدة مع اى فيشه تشوفها وأي مكان لفيوز او كتاوت
طبعا كاست العربيه فكه وسيبه دلوقتى خلينا فى الاساس مش وقته
وسيب ام التكييف خلينا نظبط الدنيا الاول لانه دا لازم يتحل التبلوة
فرش العربيه بقا تدية للمدام ماهى برضه لازم تشاركك مش كل شوية ودينى عند ماما ووصلنى لاختى وودينى السوق وهات العيال من ام المدرسه والخ …… خليها تتعب معاك وتغسل الفرش و فرش الارضيه وخليه بقا فى البلكونه يتهوى وينشف هياخد بتاع يومين تلاته مثلا
نرجع تانى للعربيه فوطة قطن بقا يا معلم ونشف العربيه حته حته وبراحتك اوى ولو فى هوا يبقا عنب
نخش بقا على الاهم الموتور
هتفك البوابه الاول وتبص الدنيا رايقة يبقي تمام النضافة العادية بتاعت تغير الفلاتر ونضافة البوابه وفك الحساسات وتنضيف الفيش وعلبة الفيوزات والكتاوت بالاكاى ونفس الفرشه وتنفخ الدينامو
نضفت وظبط ونفسك راضية عن اللى عملته تمام سبها بقا زى ماهى فى الشمس يومين وبعد كدة ركب الكنترول وبسم الله دور وبراحة على المكنه عشان لو فى رواسب دخلت غرفة الحريق تطلع كدة خلاص اطلع بقا على بنزينه واغسل العربيه من تحت وروق عليها وغير زيت وفلتر
طيب لو لاقدر الله لولاقيت ميه فى البوابه
بص بقا يا معلم
هتروح لميكانيكى محترم وطبعا هتجر العربيه
هيحل الوش بتاع المكنه ويسلك وينضف الوش والبلوك والكرتير ويغسلهم ويظبط الدنيا
وانت حالل بالمرة لو جلد الصباب ناشف غيرة واعمل رودية وطقم جوانات وسيور وفلاتر ويروق المكنه معلش هتكلفك شوية بس مش هتخسر المكنه
وربنا يسترها علينا جميعا

#عربية معاك في كل وقت

share Now

Leave a Comment

This site uses Akismet to reduce spam. Learn how your comment data is processed.