Table of Contents
رعشة الطارة او اهتزاز الطارة او رعشة الدركسيون
رعشة الدركسيون ليها اسباب كتير منها
وجود مشكلة في الكاوتش
وجود مشكلة في الجنوط
وجود مشكلة في بيض المقصات
وجود مشكلة في الكبالن الداخلية
وجود مشكلة في الطنابير الخاصة بالفرامل
وعشان تعرف السبب يجب المراجعة بالترتيب علي
اولا الكاوتش ان مفيش فرده فيها رفه او لوحة او خارج منها سلك او وجود بالونة في الكاوتش لأن ده بيعمل رعشة في الطارة
ثانيا الترصيص لو الرعشة في الطارة بتظهر قبل ال 80 يبقي ترصيص عجل امامي لو بعد ال 100 يبقي ترصيص خلفي
لو رصصت وراجعت عالكاوتش والجنوط وظبط الزوايا ولسه في رعشه الطارة موجوده يبقي محتاج تروح لعفشجي
-يشوف جلب المقصات او- بيض المقصات ويشوف الاسكاترا ويراجع علي الكبالن الداخلية
لو عملت كل ده ولسه في رعشة في الطارة او لو الرعشة بتظهر بشكل اكبر مع الفرامل يبقي انت محتاج تكشف عالطنابير لأن غالبا بقي فيها اعوجاج
او لوحة او ريجه حسب لغة الصنايعي
ودي بتكون بسبب انك غسلت العربية بعد مشوار او دخلت في ماية وانت ماشي والطنابير سخنة وبيكون حلها انك تمسح الطنابير في مخرطة او تغيرها ويفضل تغييرها جديد
لو عندك اي اضافة او مشكلة تانية كانت السبب يا ريت تقولنا في الكومنتات
